ກະຊວງສາທາລະນະສຸກໄດ້ໃຫ້ຄວາມສຳຄັນ ແລະ ເອົາໃຈໃສ່ສຸຂະພາບຂອງປະຊາຊົນບັນດາເຜົ່າ ໂດຍສະເພາະສຸຂະພາບຂອງແມ່ ແລະ ເດັກ. ໂດຍອີງໃສ່ຍຸດທະສາດການປະຕິຮູບສາທາລະນະສຸກ ໄລຍະທີ 3 (2021-2025) ໄດ້ເນັ້ນໃຫ້ປະຊາຊົນ ໄດ້ເຂົ້າເຖິງການບໍລິການສາທາລະນະສຸກ ທຸກຖ້ວນໜ້າ, ສຸຂະພາບດີແມ່ນຄວາມຕ້ອງການພື້ນຖານຂອງຄຸນນະພາບຊີວິດທີ່ດີ, ການພັດທະນາວຽກງານແມ່ ແລະ ເດັກເກີດໃໝ່ ແມ່ນໄດ້ເນັ້ນໜັກເຖິງການປັບປຸງ ສຸຂະພາບ ຂອງ ແມ່ ແລະ ເດັກ ເພື່ອຫຼຸດຜ່ອນ ອັດຕາການຕາຍຂອງເດັກເກີດໃໝ່ ແລະ ເດັກນ້ອຍ ຕ່ຳກວ່າ 5 ປີ ໃຫ້ຢູ່ໃນ ລະດັບ 45 ແລະ 70 ຄົນ ຕໍ່ 1,000 ຄົນ ທີ່ມີຊີວິດຢູ່.

ພິທີສະເຫຼີມສະຫຼອງ ຄັ້ງນີ້ກໍ່ແມ່ນເພື່ອ ຜ່ານບົດຕີລາຄາຜົນຂອງການຈັດຕັ້ງປະຕິບັດວຽກງານແມ່ ແລະ ເດັກ ຂອງໂຮງໝໍແມ່ ແລະ ເດັກເກີດໃໝ່ ແຕ່ປີ 1994-2024 (30 ປີ) ແລະ ທິດທາງແຜນການປີ 2025 ພ້ອມທັງເປັນການສະເຫຼີມສະຫຼອງ ວັນສ້າງຕັ້ງໂຮງໝໍແມ່ ແລະ ເດັກເກີດໃໝ່ ຄົບຮອບ 30 ປີ ທີ່ທາງໂຮງໝໍໄດ້ເລີ່ມຈັດຕັ້ງ, ປະຕິບັດ ໃຫ້ບໍລິການດ້ານແມ່ ແລະ ເດັກ ໃນຂົງເຂດທົ່ວປະເທດ.